پنجاب کاؤنٹر نارکوٹکس فورس (CNF) نے گزشتہ 10 روز کے دوران صوبے کے مختلف اضلاع میں 52 کامیاب انٹیلی جنس بیسڈ کارروائیاں کیں۔ یہ کارروائیاں لاہور، سرگودھا، ڈی جی خان، ملتان، راولپنڈی، فیصل آباد، گوجرانوالہ اور بہاولپور میں کی گئیں، جن میں 53 منشیات فروشوں کو گرفتار کیا گیا جن میں خواتین بھی شامل ہیں۔

کارروائیوں کے دوران مجموعی طور پر 108 کلوگرام منشیات برآمد کی گئی جن کی مالیت کا تخمینہ تقریباً 2 کروڑ روپے لگایا گیا ہے۔ برآمد ہونے والی منشیات میں 50 کلوگرام چرس، 1 کلوگرام ویڈ، 25 کلوگرام افیون، 3 کلوگرام آئس، 27 کلوگرام کینابس، 2 کلوگرام ہیروئن اور 1200 ایکسٹیسی گولیاں شامل ہیں۔

مزید برآں، ان کارروائیوں کے دوران مختلف اقسام کے 19 ہتھیار بھی برآمد کیے گئے جن میں 10 پستول، 5 سب مشین گنز (SMGs) اور 4 رائفلز شامل ہیں۔ گرفتار ملزمان کے خلاف مقدمات درج کر کے مزید تفتیش کی جا رہی ہے۔

اگست 2025 میں آپریشنل ہونے کے بعد سے اب تک پنجاب سی این ایف مجموعی طور پر 15.8 ٹن منشیات برآمد کر چکی ہے جن کی مالیت کا تخمینہ 2.132 ارب روپے سے زائد ہے۔ یہ کامیابیاں صوبے میں منشیات کے خاتمے کے لیے جاری کوششوں کا منہ بولتا ثبوت ہیں۔

پنجاب سی این ایف صوبے میں منشیات کے خاتمے کے لیے اپنی کارروائیاں اسی طرح سے جاری رکھے گی۔ ترجمان کے مطابق عوام سے درخواست ہے کہ وہ منشیات کی اسمگلنگ کے بارے میں کسی بھی معلومات سے فورس کو آگاہ کریں، اطلاع دینے والوں کی شناخت خفیہ رکھی جائے گی۔