لاہور — کاؤنٹر ٹیررازم ڈیپارٹمنٹ (سی ٹی ڈی) نے دہشت گردی کے خدشات کے پیش نظر پنجاب کے مختلف شہروں میں ایک ماہ میں 386 انٹیلی جنس بیسڈ آپریشنز (IBOs) کیے، جن کے نتیجے میں 18 مبینہ دہشت گردوں کو حراست میں لے لیا گیا۔

ترجمان سی ٹی ڈی پنجاب کے مطابق یہ کارروائیاں لاہور، منڈی بہاؤالدین، خوشاب، بہاولپور، ٹوبہ ٹیک سنگھ، گوجرانوالہ، نارووال، پاک پتن اور بھکر میں کی گئیں۔ گرفتار ہونے والے مبینہ دہشت گردوں میں ایک انتہائی خطرناک دہشت گرد تنظیم کا اہم رکن بھی شامل ہے جو پنجاب کے ایک شہر میں دہشت گردی کی مکمل منصوبہ بندی کر چکا تھا۔

ترجمان نے مزید بتایا کہ دہشت گردوں کے قبضے سے دھماکہ خیز مواد، ای آئی ڈی بم، 3 ڈیٹونیٹرز، 13 حفاظتی فیوز وائر، پمفلٹ، نقدی اور پرائما کارڈ برآمد کیے گئے ہیں۔ گرفتار دہشت گردوں کی شناخت محمد کریم، علی رضا، محمد عزیز، محمد علی، ہاشم، نورالامین، سلیم اور صدام وغیرہ کے نام سے ہوئی ہے۔

حکام سی ٹی ڈی کا کہنا ہے کہ یہ دہشت گرد مختلف مقامات پر کارروائی کرکے عوام میں خوف و ہراس پھیلانا چاہتے تھے۔ رواں ماہ میں 4601 کومبنگ آپریشنز کے دوران 320 مشتبہ افراد کو بھی گرفتار کیا گیا، جبکہ کومبنگ آپریشنز میں 109892 افراد سے پوچھ گچھ کی گئی۔

سی ٹی ڈی کا کہنا ہے کہ وہ "محفوظ پنجاب" کے ہدف پر عمل پیرا ہے اور دہشت گردی کے ناسور کو جڑ سے اکھاڑ پھینکنے کے لیے پرعزم ہے۔