طلاق یافتہ بیٹی کو پنشن نہ دینے کا سرکلر کالعدم، سپریم کورٹ کا تاریخی فیصلہ
سپریم کورٹ نے ایک تاریخی فیصلے میں والد کی وفات کے بعد طلاق یافتہ بیٹی کو پنشن نہ دینے کا سرکلر کالعدم قرار دے دیا ہے۔ جسٹس عائشہ ملک نے 10 صفحات پر مشتمل تحریری فیصلے میں ریمارکس دیے کہ بیٹی کی پنشن شادی کی حیثیت پر نہیں بلکہ حق کی بنیاد پر دی جائے گی اور اس کے لیے والد کی وفات سے پہلے یا بعد میں طلاق کا معاملہ غیر متعلقہ ہے۔
فیصلے میں کہا گیا کہ پنشن خیرات نہیں بلکہ سرکاری ملازم کا آئینی اور قانونی حق ہے جو اہلخانہ کو منتقل ہوتا ہے۔ عدالت نے سندھ حکومت کے 2022 کے امتیازی سرکلر کو غیر قانونی قرار دیتے ہوئے کہا کہ خواتین کی پنشن کا انحصار صرف مالی ضرورت پر ہونا چاہیے، شادی کی حیثیت پر نہیں۔ سپریم کورٹ نے سندھ حکومت کی اپیل مسترد کرتے ہوئے سندھ ہائیکورٹ کا فیصلہ برقرار رکھا۔
وزیراعلیٰ مریم نواز کی نئی مثال: پنجاب میں پہلی بار اپوزیشن کے حلقوں کو بھی ترقیاتی فنڈز جاری
وزیراعلیٰ پنجاب مریم نواز نے "سب کے لیے ترقی" کے ماڈل کے تحت ایک نئی سیاسی روایت قائم کرتے ہوئے پنجاب کی تاریخ میں پہلی بار اپوزیشن کے حلقوں کو بھی بڑے ترقیاتی فنڈز میں شامل کر لیا ہے۔ پنجاب حکومت نے "مثالی گاؤں پروگرام" کا دائرہ اپوزیشن کے حلقوں تک بڑھا دیا ہے، جس کے تحت 500 سے زائد گاؤں میں ترقیاتی کاموں کا آغاز کر دیا گیا ہے۔
ان منصوبوں پر مجموعی طور پر 136 ارب روپے خرچ کیے جائیں گے، جن میں گلیوں کی پختگی، سیوریج نظام کی بہتری، اور سٹریٹ لائٹس جیسی بنیادی سہولیات فراہم کی جائیں گی۔ اس اقدام کو سیاسی رواداری اور شراکتی طرز حکمرانی کی عملی تصویر قرار دیا جا رہا ہے۔
9 مئی جوڈیشل کمپلیکس میانوالی کیس کا فیصلہ: ایک ملزم کو 25 سال قید، 51 اشتہاری قرار
سرگودھا کی انسدادِ دہشتگردی عدالت نے 9 مئی کو جوڈیشل کمپلیکس میانوالی پر حملے کے کیس کا فیصلہ سنا دیا ہے۔ عدالت نے مقدمے میں گرفتار ملزم اسماعیل کو 25 سال قید کی سزا سنائی ہے، جبکہ احمد خان بچھر، احمد چھٹہ اور بلال اعجاز سمیت 51 ملزموں کو اشتہاری قرار دے دیا گیا ہے۔ عدالت اس سے قبل پی ٹی آئی رہنما عمر ایوب خان کے ناقابلِ ضمانت وارنٹ گرفتاری بھی جاری کرچکی ہے۔
سپریم کورٹ نے 23 وکلاء کو وکالت کے لائسنس جاری کر دیے، فہرست جاری
سپریم کورٹ نے وکالت کا لائسنس حاصل کرنے والے 23 خوش نصیب وکلاء کے ناموں پر مشتمل پہلی فہرست جاری کر دی ہے۔ سپریم کورٹ کی انرولمنٹ کمیٹی نے جسٹس جمال خان مندوخیل کی سربراہی میں انٹرویوز کے بعد ان وکلاء کو سپریم کورٹ میں وکالت کے لیے اہل قرار دیا۔ لائسنس حاصل کرنے والوں میں لاہور، فیصل آباد، ملتان، بہاولپور، سرگودھا اور گجرات سے تعلق رکھنے والے وکلاء شامل ہیں۔
سیشن کورٹ میں بھرتیوں کا جعلی اشتہار وائرل، عوام پریشان
سوشل میڈیا پر سیشن کورٹ میں بھرتیوں کا ایک جعلی اشتہار وائرل ہونے سے عوام اور محکمہ شدید پریشانی کا شکار ہوگئے ہیں۔ اشتہار کے باعث شہری بڑی تعداد میں درخواستیں لے کر سیشن کورٹ پہنچ گئے۔ سیشن جج کے سٹاف افسر واجد علی گجر نے وضاحت کی ہے کہ سیشن کورٹ نے بھرتیوں کا کوئی اشتہار جاری نہیں کیا اور عوام کو پریشانی سے بچانے کے لیے عدالت کے باہر تنبیہی نوٹس آویزاں کر دیے گئے ہیں۔
5 اگست کو مینارِ پاکستان پر جلسہ: ہائیکورٹ نے پی ٹی آئی کی درخواست پر اعتراض لگا دیا
لاہور ہائیکورٹ کے رجسٹرار آفس نے پاکستان تحریکِ انصاف (پی ٹی آئی) کی جانب سے 5 اگست کو مینارِ پاکستان پر جلسے کی اجازت کے لیے دائر درخواست اعتراض لگا کر واپس کر دی ہے۔ رجسٹرار آفس نے اعتراض عائد کیا ہے کہ درخواست گزار نے داد رسی کمیشن سے رجوع نہیں کیا۔ یہ درخواست صدر پی ٹی آئی لاہور، ایم پی اے شیخ امتیاز کی جانب سے دائر کی گئی تھی۔
