فیصل آباد: تھانہ بلوچنی کے علاقہ میں پولیس مقابلہ، ایک ڈاکو ہلاک
فیصل آباد میں تھانہ بلوچنی کے علاقے میں پولیس کو وائرلیس پر اطلاع موصول ہوئی کہ چار مسلح ملزمان شہری آصف سے موٹر سائیکل، نقدی اور دیگر سامان چھین کر فرار ہو گئے ہیں۔ اطلاع پر ایس ایچ او سب انسپکٹر اعجاز احمد نفری کے ہمراہ روانہ ہوئے اور 90 رب پل پر ناکہ بندی کروائی۔
ناکہ بندی کے دوران دو موٹر سائیکلوں پر سوار چار مشکوک افراد کو رکنے کا اشارہ کیا گیا، لیکن انہوں نے قریبی فصلوں میں چھپ کر پولیس پارٹی پر جان لیوا فائرنگ شروع کر دی۔ پولیس نے حفاظتی خود اختیاری کے تحت جوابی فائرنگ کی۔ فائرنگ کا سلسلہ رکنے پر جب تلاشی لی گئی تو ایک ملزم مردہ حالت میں پایا گیا جو اپنے ہی ساتھیوں کی فائرنگ سے ہلاک ہوگیا تھا۔ اس کے دیگر ساتھی تاریکی اور فصلوں کا فائدہ اٹھاتے ہوئے فرار ہونے میں کامیاب ہوگئے۔
ہلاک ہونے والے ملزم کی شناخت عرفان عرف فانی کے نام سے ہوئی ہے، جس کے قبضے سے پسٹل، مسروقہ موٹر سائیکل اور پرس برآمد ہوا۔ پولیس کے مطابق فرار ملزمان کی گرفتاری کے لیے شہر بھر میں ناکہ بندی کر دی گئی ہے اور انہیں جلد گرفتار کر لیا جائے گا۔
رحیم یار خان: کچہ میں پولیس پر شدید حملہ، 5 اہلکار شہید (غیر حتمی اطلاع)
رحیم یار خان کے کچے کے علاقے میں کریمنلز کی طرف سے ماہی چوک کے قریب بستی شیخانی پکٹ پر موجود پولیس پارٹی پر شدید حملہ کیا گیا ہے۔ اطلاعات کے مطابق بھاری اسلحہ اور راکٹ لانچرز سے لیس 40 سے 50 ڈاکوؤں نے ایلیٹ پولیس کی دو ٹیموں پر حملہ کیا، جس کے نتیجے میں ابتدائی طور پر 5 اہلکار شہید ہو گئے۔ شہید ہونے والے جوانوں میں سلیم اور غضنفر شفیق بھی شامل ہیں۔
واقعے کے بعد ڈی پی او رحیم یار خان بھاری نفری کے ہمراہ موقع پر پہنچ گئے ہیں اور ڈاکوؤں کو گھیرے میں لے لیا گیا ہے، جبکہ رحیم یار خان اور بہاولپور کی مزید نفری کو بھی طلب کر لیا گیا ہے۔ اس حملے نے ضلع کی فضا کو ایک بار پھر سوگوار کر دیا ہے۔
یہاں یہ امر قابلِ ذکر ہے کہ کچے کا تقریباً 22 کلومیٹر کا علاقہ ڈاکوؤں کے کنٹرول میں ہے، جہاں انہوں نے ریاست کے اندر ریاست قائم کر رکھی ہے۔ ہر سال کچے کے ڈاکوؤں کے خلاف آپریشن کے نام پر اربوں روپے کے فنڈز جاری ہوتے ہیں، لیکن چند سو ڈاکوؤں کا خاتمہ ممکن نہیں ہو سکا، سوالیہ نشان کھڑے ہو گئے ہیں۔
نوٹ: یہ ایک غیر حتمی خبر ہے اور اس کی مکمل تفصیلات کی تصدیق کی جا رہی ہے۔ حتمی معلومات موصول ہونے پر آپ کو آگاہ کیا جائے گا۔
