لاہور: کپڑوں میں جذب 3.8 کلو آئس ہیروئن دبئی اسمگل کرنے کی کوشش ناکام
لاہور ایئرپورٹ پر اے ایس ایف نے دبئی جانے والے مسافر سے کپڑوں میں جذب شدہ 3.8 کلو گرام آئس ہیروئن برآمد کرکے اسمگلنگ کی بڑی کوشش ناکام بنا دی ہے۔
ترجمان اے ایس ایف کے مطابق، شارجہ جانے والی پرواز کے مسافر کے سامان کی اسکیننگ کے دوران ایک کارٹن کو مشکوک پایا گیا۔ دستی تلاشی پر کارٹن میں موجود 3 مردانہ جوڑوں (سوٹ) میں انتہائی مہارت سے چھپائی گئی آئس ہیروئن برآمد ہوئی۔
ملزم نے آئس کو کیمیکل کی مدد سے کپڑوں میں جذب کر رکھا تھا۔ ابتدائی تفتیش کے بعد ملزم کو مزید قانونی کارروائی کے لیے اے این ایف (اینٹی نارکوٹکس فورس) کے حوالے کر دیا گیا ہے۔
راولپنڈی جرگہ قتل کیس: ملزم سربراہ کے تہلکہ خیز انکشافات، عدالت میں ٹک ٹاک بناتا رہا
راولپنڈی میں جرگے کے حکم پر شادی شدہ خاتون سدرہ کے قتل کیس میں اہم پیشرفت ہوئی ہے۔ قتل کا حکم دینے والے جرگے کے سربراہ عصمت اللہ نے دورانِ تفتیش اعترافِ جرم کرلیا ہے۔
ملزم نے انکشاف کیا کہ اس نے برادری کے فیصلے کے مطابق سدرہ کو قتل کیا اور بغیر لائسنس اسلحہ استعمال کیا۔ دوسری جانب، ملزم عصمت اللہ کی عدالت میں پیشی کے دوران ٹک ٹاک ویڈیوز بنانے کی تصاویر وائرل ہوگئی ہیں، جس میں وہ آزادانہ گھومتا رہا اور پولیس نے اسے روکنے کی کوئی زحمت نہیں کی، جس پر شہریوں نے شدید تنقید کی ہے۔
واضح رہے کہ مقتولہ سدرہ نے پسند کی شادی کی تھی، جس پر جرگے نے اس کے قتل کا حکم دیا۔ مقتولہ کے سسر کے مطابق، سدرہ کے گھر والوں نے رخصتی کا بہانہ بنا کر اسے واپس بلایا اور دو دن بعد اس کے قتل کی خبر ملی۔ پولیس نے مقدمے میں قتل اور شواہد چھپانے کی دفعات شامل کرکے 8 سے زائد افراد کو حراست میں لے لیا ہے۔
