اسلام آباد: ترنول میں بڑی کارروائی، 25 من گدھے کا گوشت برآمد، غیرملکی قصائی سمیت ملزمان گرفتار
دارالحکومت اسلام آباد کے قریبی علاقے ترنول میں فوڈ اتھارٹی نے ایک بڑی کارروائی کرتے ہوئے 25 من (ایک ہزار کلوگرام) سے زائد گدھے کا گوشت برآمد کر لیا۔ چھاپے کے دوران 40 سے زائد زندہ گدھے بھی ملے، جبکہ موقع سے ایک غیر ملکی قصائی اور چوکیدار کو حراست میں لے لیا گیا ہے۔ حکام نے ملوث افراد کے خلاف مقدمہ درج کرنے کے احکامات جاری کر دیے ہیں۔
گوشت کہاں سپلائی ہو رہا تھا؟ فوڈ اتھارٹی نے تحقیقات کا دائرہ وسیع کر دیا
اسلام آباد فوڈ اتھارٹی کے ڈائریکٹر عرفان میمن نے کہا کہ ایک ہفتے سے اس گروہ کے بارے میں اطلاعات تھیں اور انہیں رنگے ہاتھوں پکڑنے کے لیے منصوبہ بندی کی گئی۔ انہوں نے بتایا کہ ہر زاویے سے تحقیقات کی جا رہی ہیں کہ یہ گوشت کہاں سپلائی کیا جا رہا تھا۔ "ایسی رپورٹس ہیں کہ گوشت کچھ غیرملکی شہریوں کو سپلائی کیا جا رہا تھا، جبکہ اسے اسلام آباد سے باہر بھجوانے کی بھی اطلاعات ہیں۔ تاہم ابھی حتمی ثبوت موجود نہیں ہیں۔"
موقع پر 40 زندہ گدھے اور 1000 کلوگرام گوشت موجود تھا - ڈپٹی ڈائریکٹر فوڈ اتھارٹی
ڈپٹی ڈائریکٹر اسلام آباد فوڈ اتھارٹی ڈاکٹر طاہرہ صدیق نے تفصیلات بتاتے ہوئے کہا کہ ٹیم نے کارروائی کے دوران 25 من گوشت برآمد کیا ہے جسے تلف کیا جا رہا ہے۔ انہوں نے تصدیق کی کہ 40 سے زائد زندہ گدھے بھی برآمد ہوئے ہیں۔ ڈاکٹر طاہرہ نے کہا کہ ڈائریکٹر فوڈ اتھارٹی کی جانب سے ملوث افراد کے خلاف فی الفور مقدمہ درج کرنے کا حکم دیا گیا ہے اور گرفتار غیر ملکی شہری کو مزید تفتیش کے لیے پولیس کے حوالے کر دیا گیا ہے۔
گدھے کے گوشت کی پہچان کیسے کریں؟ ماہرین نے آسان طریقہ بتا دیا
اس واقعے کے بعد شہریوں میں تشویش کی لہر دوڑ گئی ہے۔ جانوروں کے ڈاکٹر محمد علی کے مطابق حلال گوشت اور حرام گوشت میں فرق کرنا ممکن ہے۔ انہوں نے بتایا کہ حلال طریقے سے ذبح کیے گئے جانور کے گوشت کا رنگ "برائٹ چیری ریڈ" (روشن سرخ) ہوتا ہے، جبکہ گدھے کے گوشت کا رنگ گہرا لال اور اس میں نیلاہٹ نمایاں ہوتی ہے۔ انہوں نے مشورہ دیا کہ اگر کسی ہوٹل یا دکان پر گوشت کے بارے میں شک ہو تو اس کا لیبارٹری ٹیسٹ (ایلائزا یا پی سی آر) بھی کروایا جا سکتا ہے۔
