لاہور؛ جعلی پولیس والوں کی اغواء برائے تاوان کی کوشش ناکام، رنگے ہاتھوں پکڑے گئے
لاہور میں جعلی پولیس والوں کی اغواء برائے تاوان کی کوشش ناکام ہوگئی، اصل پولیس نے رنگے ہاتھوں گرفتار کرلیا۔ ڈولفن اسکواڈ نے بروقت کارروائی کرتے ہوئے اغوا برائے تاوان کی کوشش ناکام بنائی۔
ندیم شہید چوک کے قریب مشکوک گاڑی کو روک کر مغوی عرب جان کو بازیاب کروا لیا گیا، جسے جعلی پولیس اہلکار ہتھکڑی لگا کر پشاور لے جا رہے تھے۔ ملزمان کا تعلق خیبر ایجنسی سے ہے اور انہیں مزید کارروائی کے لیے تھانہ ساؤتھ کینٹ کے حوالے کر دیا گیا ہے۔
پیشی پر آئے شہریوں کو قتل اور زخمی کرنے والا مفرور اشتہاری گرفتار
شاہدرہ ٹاؤن پولیس نے کارروائی کر کے پیشی پرآئے شہریوں کو قتل اور زخمی کرنے والا مفرور اشتہاری گرفتار کر لیا۔ اشتہاری دہشتگردی، قتل اور اقدام قتل کے مقدمہ میں پولیس کو مطلوب تھا۔ ملزم سخاوت نے ساتھیوں کے ہمراہ 2 افراد کو قتل اور 3 کو زخمی کیا تھا اور گزشتہ 4 سال سے روپوش تھا۔
آئی جی پنجاب کی جمعۃ المبارک پر سکیورٹی کے سخت انتظامات کی ہدایت
آئی جی پنجاب ڈاکٹر عثمان انور نے جمعۃ المبارک کے موقع پر لاہور سمیت پنجاب بھر میں سکیورٹی کے سخت انتظامات کی ہدایت جاری کر دی۔ انہوں نے مساجد، امام بارگاہوں، مزارات اور دیگر اہم مقامات پر سکیورٹی یقینی بنانے کی تاکید کی۔ آئی جی پنجاب نے کہا کہ پولیس افسران اپنی ذمہ داری کو عبادت سمجھ کر ادا کریں اور شہریوں کے مسائل ان کی دہلیز پر جا کر حل کریں۔
ممکنہ پولیس مقابلے روکنے کی درخواست پر عدالت نے تفصیلی رپورٹ طلب کرلی
لاہور ہائیکورٹ نے سیالکوٹ کے شہری کی اپنے بیٹے کی ممکنہ پولیس مقابلے میں ہلاکت روکنے کے لیے درخواست پر ڈسٹرکٹ جیل سے تفصیلی رپورٹ طلب کر لی۔ عدالت نے ریمارکس دیے کہ دیکھنا ہے کہ سکیورٹی فورسز، پنجاب پولیس کی موجودگی میں سی سی ڈی بنانے کی ضرورت کیوں محسوس ہوئی؟ عدالت نے 22 جولائی کو ایڈووکیٹ جنرل پنجاب کو معاونت کے لیے بھی طلب کر لیا ہے۔
شاد باغ: شراب کی سپلائی کرنے والا ملزم گرفتار، 100 لیٹر شراب برآمد
شاد باغ پولیس نے دوران پٹرولنگ خفیہ اطلاع پر کارروائی کرکے شراب کی سپلائی لے کر جانے والے ملزم فہیم عادل کو گرفتار کر لیا۔ ایس پی سٹی بلال احمد کے مطابق ملزم کے قبضہ سے لاکھوں مالیت کی 100 لیٹر شراب برآمد کی گئی ہے۔ ملزم لاہور کے مختلف مقامات پر شراب کی سپلائی کرتا تھا۔
راوی پل پر ٹرک نے موٹر سائیکل سوار خاندان کو کچل دیا، ماں اور 6 ماہ کا بچہ جاں بحق
راوی پل پر تیز رفتار ٹرک نے موٹر سائیکل سوار خاندان کو روند ڈالا، جس کے نتیجے میں 23 سالہ ارم اور اس کا چھ ماہ کا شیر خوار بیٹا عمر موقع پر ہی جاں بحق ہو گئے، جبکہ باپ عدنان شدید زخمی ہو گیا۔ پولیس کے مطابق حادثے کے بعد ٹرک ڈرائیور موقع سے فرار ہو گیا، جس کی تلاش جاری ہے۔
سی سی ڈی کا ایک اور مبینہ پولیس مقابلہ، زیر حراست ملزم ساتھیوں کی فائرنگ سے ہلاک
سی سی ڈی نواں کوٹ کا زیر حراست ملزم مبینہ پولیس مقابلے میں مارا گیا۔ پولیس ذرائع کے مطابق پولیس ملزم قاسم علی کو ریکوری کے لئے نواب ٹاؤن لے کر جا رہی تھی کہ اس کے ساتھیوں نے فائرنگ کر دی۔ زیر حراست ملزم اپنے ہی ساتھیوں کی گولیوں کی زد میں آکر موقع پر دم توڑ گیا۔
بغیر ہیلمٹ موٹرسائیکل سوار اہلکاروں کی بھی شامت آگئی، سخت کارروائی کا حکم
سی ٹی او لاہور اطہر وحید نے ٹریفک پولیس کو بغیر ہیلمٹ موٹرسائیکل چلانے والوں کے خلاف سخت کارروائی کی ہدایت کی ہے۔ پیر سے شہر میں بغیر ہیلمٹ اور بغیر نمبر پلیٹ موٹرسائیکل سوار اہلکاروں پر بھی مقدمات درج ہوں گے۔ سی ٹی او کے مطابق کارروائی نہ کرنے والے وارڈنز کی ایک سال کی نوکری ضبط ہو گی۔
جوہر ٹاؤن: کبوتروں پر ظلم کرنے والا ملزم گرفتار
جوہر ٹاؤن کے علاقہ میں کبوتروں پر ظلم کرنے والے ملزم عالم شیر کو پولیس نے گرفتار کر کے مقدمہ درج کر لیا ہے۔ ملزم کبوتروں کو اُچھالنے کی ویڈیو سوشل میڈیا پر لگاتا تھا۔ پولیس نے کارروائی کے دوران 80 سے 90 کبوتر برآمد کئے ہیں جن میں سے کئی زخمی اور کمزور حالت میں تھے۔
ٹریفک پولیس کی کارروائی، پیشہ ور بھکاریوں کے چنگل سے 11 بچے بازیاب
چیف ٹریفک آفیسر لاہور ڈاکٹر اطہر وحید کے حکم پر اینٹی بیگنگ سکواڈ نے کارروائی کرتے ہوئے پیشہ ور بھکاریوں کے چنگل سے 11 بچے بازیاب کرا لیے۔ ان بچوں کو چائلڈ پروٹیکشن اینڈ ویلفیئر بیورو اور ایدھی ہومز کے حوالے کر دیا گیا ہے۔
لاہور: چھت گرنے سے باپ بیٹی جاں بحق، دوسرے واقعہ میں 4 افراد زخمی
ریلوے روڈ کے علاقے میں دو منزلہ گھر کی چھت گرنے سے 45 سالہ الطاف حسین اور اس کی 4 سالہ بیٹی نور فاطمہ ملبے تلے دب کر جاں بحق ہو گئے۔ دوسری جانب ملتان روڈ پر ایک اور گھر کی چھت گرنے سے 4 افراد زخمی ہوگئے جنہیں ریسکیو نے ملبے سے نکال کر ہسپتال منتقل کر دیا۔
تاجروں کو ہراساں کیا جارہا ہے، 19 جولائی کو ہڑتال کریں گے: صدر انجمن تاجراں
صدر انجمن تاجران مجاہد مقصود بٹ نے کہا ہے کہ 19 جولائی کو ایف بی آر کے تاجر دشمن قوانین کے خلاف ہڑتال کی جائے گی۔ انہوں نے الزام عائد کیا کہ ہڑتال ناکام بنانے کے لیے تاجروں کو ہراساں کیا جارہا ہے۔ انہوں نے مطالبہ کیا کہ حکومت تاجروں کو ڈرانے دھمکانے کے بجائے کالے قوانین فوری واپس لے۔
مون سون بارشیں: پنجاب بھر میں ریسکیو 1122 ہائی الرٹ
مون سون کی شدید بارشوں اور ممکنہ رین ایمرجنسی کے پیش نظر پنجاب بھر میں ریسکیو 1122 کی ٹیموں کو ہائی الرٹ کر دیا گیا ہے۔ 25 جون سے اب تک بارشوں سے جڑے مختلف حادثات میں 109 افراد جان کی بازی ہار چکے ہیں۔ صوبے بھر میں 15 ہزار سے زائد ریسکیورز کو ہنگامی صورت حال سے نمٹنے کیلئے تیار رکھا گیا ہے۔
شدید بارشیں: شاہ حسین ایکسپریس عارضی طور پر منسوخ
ملک کے مختلف حصوں میں جاری شدید بارشوں اور سیلابی صورتحال کے باعث ریلوے انتظامیہ نے لاہور سے کراچی براستہ فیصل آباد جانے والی شاہ حسین ایکسپریس کو عارضی طور پر منسوخ کرنے کا اعلان کیا ہے۔ ترجمان کے مطابق یہ فیصلہ مسافروں کی حفاظت کو مدنظر رکھتے ہوئے کیا گیا ہے۔
لاہور میں موسلادھار بارش، نشیبی علاقے اور ریلوے سٹیشن زیر آب
مون سون سسٹم کے تحت لاہور کے مختلف علاقوں میں موسلادھار بارش سے نشیبی علاقے زیر آب آگئے جبکہ ریلوے سٹیشن کے پلیٹ فارم نمبر دو اور چار کا ٹریک بھی پانی میں ڈوب گیا۔ واسا کے مطابق چوک نا خدا میں سب سے زیادہ 63 ملی میٹر بارش ریکارڈ کی گئی۔
دریاؤں میں پانی کے بہاؤ میں اضافہ، پی ڈی ایم اے نے رپورٹ جاری کردی
مون سون بارشوں اور گلیشیئر پگھلنے کے باعث دریاؤں میں پانی کے بہاؤ میں اضافہ ہونے لگا ہے۔ پی ڈی ایم اے کے مطابق دریائے سندھ میں تربیلا اور چشمہ کے مقام پر نچلے درجے کا سیلاب ہے۔ رواں سال بارشوں کے باعث 103 شہری جاں بحق اور 393 زخمی ہوئے۔ ڈی جی پی ڈی ایم اے نے متعلقہ اضلاع کی انتظامیہ کو الرٹ رہنے کی ہدایات جاری کی ہیں۔
