بلوچستان: سیکیورٹی فورسز کا بڑا آپریشن، 4 روز میں 50 دہشتگرد ہلاک
سیکیورٹی فورسز نے بلوچستان کے ضلع ژوب کے علاقے سمبازا میں ایک بڑے آپریشن کے دوران فتنۃ الہندوستان کے مزید 3 دہشت گردوں کو ہلاک کر دیا ہے۔ آئی ایس پی آر کے مطابق، گزشتہ چار روز سے جاری آپریشنز میں ہلاک ہونے والے دہشت گردوں کی مجموعی تعداد 50 ہوگئی ہے۔
آئی ایس پی آر کا کہنا ہے کہ دہشت گردوں کے قبضے سے بھاری مقدار میں اسلحہ، بارود اور دھماکا خیز مواد برآمد ہوا ہے۔ صدر، وزیراعظم اور وزیر داخلہ سمیت قومی قیادت نے کامیاب آپریشن پر سیکیورٹی فورسز کو خراج تحسین پیش کرتے ہوئے دہشت گردی کے مکمل خاتمے تک جنگ جاری رکھنے کے عزم کا اعادہ کیا ہے۔
فیصل آباد: 20 بچوں سے زیادتی کا ملزم مبینہ پولیس مقابلے میں ہلاک
فیصل آباد میں ستیانہ روڈ پر بچوں سے زیادتی کا ملزم مبینہ پولیس مقابلے کے دوران مارا گیا۔ کرائم کنٹرول ڈیپارٹمنٹ (سی سی ڈی) کے مطابق، اہلکار ملزم کو برآمدگی کے لیے لے جا رہے تھے کہ اس کے ساتھیوں نے فائرنگ کر کے اسے چھڑانے کی کوشش کی۔ جوابی فائرنگ کے تبادلے میں ملزم ہلاک ہوگیا جبکہ اس کے ساتھی فرار ہونے میں کامیاب رہے۔
سی سی ڈی نے بتایا کہ ہلاک ملزم نے 20 بچوں کی نازیبا ویڈیوز بنا کر انہیں بلیک میل کرنے کا اعتراف کیا تھا۔ واضح رہے کہ پنجاب میں حالیہ دنوں میں زیادتی کے ملزمان کی پولیس مقابلوں میں ہلاکت کے واقعات میں اضافہ ہوا ہے۔
کراچی: ایک گھنٹے میں 2 شہری قتل، مشتعل عوام نے ڈاکو کو مار ڈالا
کراچی میں اسٹریٹ کرائم کی وارداتیں بے قابو ہوگئیں، صرف ایک گھنٹے کے دوران ڈاکوؤں کی فائرنگ سے 2 شہری جاں بحق ہوگئے۔ کورنگی میں ڈکیتی کے دوران مزاحمت پر ڈاکوؤں نے غلام محمد نامی شہری کو قتل کر دیا، جس پر مشتعل شہریوں نے ایک ڈاکو کاشف کو تشدد کر کے ہلاک کر دیا، جبکہ دوسرے کو زخمی حالت میں پولیس کے حوالے کر دیا۔
دوسرا واقعہ نیو کراچی میں پیش آیا جہاں ڈاکو کی فائرنگ سے ہوٹل پر بیٹھا ایک شہری جان کی بازی ہار گیا۔ پولیس نے دونوں واقعات کی تحقیقات شروع کر دی ہیں۔
