لاہور: چیکنگ کے دوران تلخ کلامی، کار سوار خاتون نے لیڈی پولیس اہلکار کا سر پھاڑ دیا
لاہور کے علاقے محمود بوٹی ناکہ پر معمول کی چیکنگ کے دوران ایک کار سوار خاتون نے مشتعل ہو کر لیڈی پولیس اہلکار کو شدید زخمی کر دیا۔ ترجمان پولیس کے مطابق، خاتون نے گاڑی روکنے پر اہلکاروں سے جھگڑا شروع کر دیا اور ٹریفک بلاک کر دی۔
ڈیوٹی پر موجود لیڈی پولیس اہلکار رباب نے جب مشتعل خاتون کو گاڑی سائیڈ پر کرنے کا کہا تو اس نے طیش میں آکر دھات کی بوتل اہلکار کے سر پر دے ماری، جس سے لیڈی اہلکار کا سر پھٹ گیا اور وہ زخمی ہو گئیں۔
ترجمان پولیس نے بتایا کہ خاتون نے دیگر اہلکاروں کے ساتھ بھی بدتمیزی کی اور سنگین نتائج کی دھمکیاں دیں۔ ملزمہ سمیرا کو حراست میں لے کر تھانہ مناواں منتقل کر دیا گیا ہے، جہاں اس کے خلاف قانونی کارروائی عمل میں لائی جا رہی ہے۔
بہاولپور: نوجوان سے زیادتی اور بلیک میلنگ کے الزام میں 2 خواتین گرفتار
بہاولپور میں پولیس نے ایک نوجوان کی درخواست پر دو خواتین کو مبینہ طور پر زیادتی کی کوشش اور بلیک میلنگ کے الزام میں گرفتار کر لیا ہے۔ نوجوان نے الزام عائد کیا ہے کہ خواتین ایک گینگ چلاتی ہیں جو مردوں کو دوستی کے بہانے پھنسا کر بلیک میل کرتی ہیں۔
جلال پور پیر والا کے رہائشی نوجوان نے تھانہ دھوڑ کوٹ میں دی گئی درخواست میں مؤقف اختیار کیا کہ بستی ودھنور کی رہائشی دو خواتین نے اس سے دوستی کی اور پھر زیادتی کی کوشش کی۔
نوجوان کے مطابق، خواتین نے اپنے گروہ کے دیگر مردوں کو بلا کر اس سے لاکھوں روپے لوٹنے کی بھی کوشش کی۔ پولیس نے دونوں خواتین کو حراست میں لے کر معاملے کی تحقیقات کا آغاز کر دیا ہے۔
